আহক আপোনাক হত্যা কৰো

 

আপোনাৰ অহমিকাৰ শেষ নাই

বসন্তত সকলোৰে হৃদয়ত পলাশ ফুলিল এজাৰ ফুলিল

কোনো স্বপ্নাতুৰৰ হৃদয়ত এজাৰে বেজাৰ আনিলে

পিছে আপোনাৰ হৃদয়ত হেনো মদাৰৰ ফুলে সুগন্ধি বিলালে৷

হাঁহিছিল আপুনি

প্ৰেম হেনো উন্মাদ বালকৰ হৃদয়ৰ

বিষণ্ণ প্ৰত্যয়

হাঁহিছিল আপুনি

প্ৰেম হেনো অভিসাৰিকা নাৰীৰ

চেনেহৰ কুটিলতা

প্ৰেম হেনো

কাপুৰুষৰ আত্ম-সন্তুষ্টি৷

গোপন সূত্ৰে গম পোৱা মতে ফ্ৰয়েডেও হেনো কান্দিছিল

আপোনাৰ দৰ্শন ত্বত্ত্ব শুনি৷

পল্টনবজাৰৰ ৰেল ষ্টেচনৰ ছিন্নবস্ত্ৰা ভিখাৰীণীৰ জীয়েকক

দেখি হেনো আপোনাৰ হৃদয়েও উচুপি উঠিছিল

পিছে শুনামতে আপোনাৰ হৃদয়ৰ উচুপনিয়ে হেনো

আপোনাৰ পকেট গলাব নোৱাৰিলে৷

আপোনাৰ অহমিকাই হেনো আপোনাক ৰূধিছিল

দুটি টকা দলিয়াই দিবলৈ আৰু ক’বলৈ,

যা কিবা কিনি খাগৈ

আপোনাৰ অহমিকাই হেনো

সকলোৱে শুনাকৈ ফুচফুচাইছিল,

ভিক্ষা কৰি খোৱাতকৈ মৰি নেযাৱ কিয়৷

সেয়ে ভাবিছো আপোনাক হত্যাকে নকৰো কিয়

হৃদয়তো আপোনাৰ মৃত

আহক আজি আপোনাক হত্যা কৰো৷

০৮.০৫.১৩