স্বস্তিকা- কোনো ভাল কামৰ আৰম্ভণি




মৃদুল কুমাৰ শৰ্মাৰ ব্লগ

হৃদয়বিদাৰক ফ’টোৰ প্ৰচলন

আজিৰ পৰা কেইবছৰমানৰ আগৰ কথা৷ ২০০৬-০৭ মান হ’ব৷ এদিন ফাঁচীবজাৰৰ জেইলখনৰ ওচৰত প্ৰচণ্ড বোমা বিস্ফোৰণ এটা হ’ল৷ বিস্ফোৰণৰ প্ৰাবল্য ইমানেই আছিল যে এখনৰ ৰিক্সাৰ ওপৰত বহি থকা চালকজনৰ মূৰটোৱেই ছিঙি পৰিল৷ আৰু বহুতো লোক হতাহত হ’ল৷

পিছদিনা এখন অসমীয়া দৈনিক বাতৰিকাকতত (বেছিও হ’ব পাৰে, মই এখনত দেখিছিলো) বাতৰিটো প্ৰকাশ হ’ল৷ লগত সেই ৰিক্সাচালকজনৰ মৃত্যুৰ দৃশ্যটি৷ উস্‌, কি বীভৎস দৃশ্য৷ চকুৰে চাই থাকিব নোৱাৰি৷ ফ’টোখন দেখাৰ পিছত কেইবাদিনলৈকে মানসিকভাৱে অস্থিৰ হৈ থাকিলো৷ সেইটো অকল মোৰ ক্ষেত্ৰতেই হোৱা নাছিল৷ আৰু বহুতো লোকৰ তেনেকুৱা হৈছিল৷ আমাৰেই তেনেকুৱা হৈছিল, শিশু মনত সেই ফ’টোখনে কি ৰেখাপাত কৰিছিল সহজে অনুমেয়৷

কালিও ফেচবুকত এখন ফ’টো কেইবাজন লোকেও শ্বেয়াৰ কৰা দেখা পালো৷ এটা পথ দুৰ্ঘটনাত এজনী যুৱতীৰ দুয়োখন ভৰি অতিশয় গুৰুতৰভাৱে আঘাত পোৱাৰ ৰক্তাক্ত দৃশ্যৰ ফ’টো৷ দুৰ্ঘটনাগ্ৰস্ত যুৱতীগৰাকীৰ আশু আৰোগ্য কামনা কৰি লগে লগে প’ষ্টকেইটা Hide কৰিবলৈ বাধ্য হ’লো৷ ইমান হৃদয়বিদাৰক সেই ফ’টোখন৷

এতিয়া কথা হ’ল, সেই ফ’টোখন নিদিয়াকৈও প’ষ্ট এটাত দুৰ্ঘটনাটোৰ বিষয়ে লিখিব পৰা গ’লহেঁতেন৷ কিন্তু তাকে নকৰি কিহৰ তাড়নাত কিছুমান লোকে এনেকুৱা কিছুমান ফ’টো শ্বেয়াৰ কৰে বুজি নাপাওঁ৷ এনে ফ’টোৱে অইন লোকৰ মনত কিদৰে আঘাত দিব পাৰে তাক হয়তো তেওঁলোকে ভাবিয়েই নাচায়৷

বাতৰিকাকতখনেও হয়তো খবৰটো ’গৰম’ কৰিবলৈ সেই ফ’টোখন প্ৰকাশ কৰিছিল প্ৰথম পৃষ্ঠাতে৷ দুৰ্ঘটনাত নিহত নিৰীহ মানুহৰ ’হেডলেচ’ ফ’টো প্ৰিণ্ট কৰি বাতৰিকাকতৰ মালিক, সম্পাদক, প্ৰকাশকসকলো হৈ উঠিছিল একোটা ’হেডলেচ চিকেন’৷

বাতৰিকাকতত আজিকালি হয়তো তেনেকুৱা ফ’টো নিদিয়ে৷ ভাল কথা৷ কিন্তু এতিয়া ফেচবুকত এনে ফ’টোৰ প্ৰচলন কেনেদৰে ৰোধ কৰা যায়৷ কেৱল নিদিবলৈ আহ্বান কৰিলেই যথেষ্ট হ’বনে?

ৰাইজৰ মতামত বিচৰা হ’ল৷


মতামতসমূহঃ

comments powered by Disqus

যোগাযোগ

ফেচবুক গোট:
Write Assamese on Mac
                 

ই-মেইল:  feedback@mridulkumar.com